Елиф Елмас засекогаш ќе го памети стадионот „Луиџи Ферарис“ во Џенова каде вечерва го постигна првиот погодок во кариерата во Серија А. Му тргна и на Наполи кој славеше со 2-4 против домашниот тим на Сампдорија. Елмас беше стартер и му заблагодари на тренерот Џенаро Гатузо со погодок што го постигна во 16.минута. Во тие моменти Наполи поведе со 0-2, откако Аркадиуш Милик во третата минута донесе минимална предност.
Но, Сампдорија не се предаде лесно. Квалјарела во 26.минута намали на 1-2, а по прегледување на ВАР снимка беше поништен гол со ножички на Гастон Рамирез во вториот дел. Сепак, Габијадини од пенал израмни на 2-2 во 73.минута.
Елиф Елмас беше заменет во 79.минута и на негово место во игра влезе Политано, а Диего Деме повторно донесе водство за „наполитанците“ во 83.минута. Дрис Мертенс во судиското продолжение го постави конечниот резултат, 2-4.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
