Еден од најдобрите македонски фудбалери Елиф Елмас повторно е водечката алка во тимот до триумфот над Малта од 2-1 на стартот од квалификациите за Европското првенство 2024.
Елмас постигна убав погодок за водство од 1-0, а ја поведе акцијата и за погодокот на Чурлинов со кој беа решени жилавите Малтежани.
„Знаевме дека ќе биде тежок натпревар, секој почеток низ еден квалификациски циклус е тежок но на крај дојдовме до заслужена победа. Најважно денеска беа трите бода и успеавме во тоа, затоа што знаеме што значи секој триумф во еден квалификациски циклус. Се лажат оние кои мислат дека за нас квалификациите главно се од следните дуели со Англија, Италија… Не. Сега почнаа квалификациите и оваа победа и овој меч се важни исто така како и сите други“ – истакна Елмас по дуелот со Малтежаните притоа нагласувајќи дека единството и тимскиот дух се тие кои ќе ги водат низ квалификациите за ЕВРО 2024.
„Треба да одиме од натпревар на натпревар, и воопшто да не се осврнуваме на останатите дуели во групата, но единствено да се концентрираме на тоа како ние играме. Самодовербата е на високо ниво во нашите редови, како и единството во тимот, и најсреќен сум што гледам дека не води тимскиот дух. Тука сме да ги исполниме задачите на селекторот и сето тоа да го сработиме на терен. А кога е така и победите ќе дојдат“ – дополни Елмас.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
