Капитенот на македонската репрезентација Енис Барди по денешниот дуел со Бугарите ја потенцираше благодарноста кон навивачите за огромната поддршка од трибините.
Барди денеска го одбележа и својот 50-ти настап во репрезентативниот дрес, а по мечот и со доза самокритика за себе и за своите соиграчи повикувајќи ги сите добро да размислат за сериозно и одговорно однесување во одредени моменти на терен.
„Знам дека, ако погледнеме реално, заслуживме повеќе од овие натпревари, но мора и да кажам по се она што ни се случи секој од нас, почнувајќи од мене, треба добро да размисли пред да дојде на следниот собир и мора на терен да бидеме посериозни и поодговорни, затоа што тоа им го должиме на овие извонредни навивачи. Сакам да искажам огромна благодарност до навивачите кои ни дадоа поддршка во голем број, и по мечот не бодреа и покажаа дека силно веруваат во нас. Затоа мора добро да размислиме ние играчите кога настапуваме за репрезентацијата, и сите заедно со јавноста да бидеме трпеливи затоа што имаме иднина пред нас и само заеднички можеме до нови успеси“ – истакна Барди.
Што се однесува до денешниот натпревар на „Тодор Проески“…
„Цел натпревар со играч помалку е навистина тешко, но и покрај тоа во второто полувреме имавме навистина неколку 100% шанси, Алиоски, Дориев…, но ете повторно како и во Грузија не ги искористивме. Навистина мечот со Бугарија го очекувавме со големо нетрпение. Но, од десетта минута останавме со играч помалку и тоа поремети многу нешта. Во секој случај, ако се се погледне, не заслуживме пораз“ – дополни Енис Барди.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
