E. Пелистер вечерва од 18:45 часот на гостувањето против норвешки Колштад ќе се збогува од Лигата на шампионите.
Повеќе од 20 години чекаа битолчани да се вратат на елитната европска сцена, но неславно заврши нивното натпреварување со најдобрите во Европа, со 13 порази низ досегашните исто толку натпревари во ЛШ. Па, вечерва против Колштад на гости останува последната надеж да се почувствува барем еден европски бод.
Натпреварот со Колштад е чисто за престиж меѓу двата тима, ако се знае дека и противникот ги загуби сите шанси за место во елиминациската фаза од ЛШ.
Тренерот Бранислав Ангеловски, пак, вели дека резултатите не се преголемо разочарување ако се има во предвид буџетот на македонскиот првак, кој е најмал во Лигата на Шампионите.
„Самото играње во ЛШ донесе многу за Битола. Со години наназад се зборуваше како и да бидеме шампиони, нема како да играме во нашиот град во елитното натпреварување. Докажавме дека тоа не е вистина, организациски извлековме повеќе од максимум од оваа сала и навистина ми е жал што во ова последно коло влегуваме без ниту еден освоен бод. Сепак, мора да сфатиме дека Еурофарм Пелистер е локален клуб, не е државен проект како Вардар. Би сакал тоа да се случи и со нас, па и со кој било друг клуб од Македонија. Ние го имаме најмалиот буџет во Лигата на шампионите. Во Европската лига има екипи кои имаат далеку поголеми буџети од нашиот и не ја поминаа групата“ – прокоментира Бранислав Ангеловски на прес-конференцијата пред гостувањето во Колштад.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
