Ракометарите на Еурофарм Пелистер денеска во Битола ќе ја пречекаат унгарска Татабања во 4. коло од второто по ранг континентално клупско натпреварување, Лигата на Европа. По првите три натпревари „зелено-белите“ имаат учинок од една победа, едно реми и еден пораз, а мечот против Татабања е шанса за втор триумф сезонава.
Крилото на „зелено-белите“, Гоце Ојлески очекува тежок и тврд натпревар, но верува дека формата на Еурофарм Пелисте е во нагорна линија и дека ќе стигнат до победа на мечот.
„Добро се познаваме со Татабања, минатата сезона одигравме неколку натпревари. Со доаѓањето на Ѓукиќ во тимот владее позитивна енергија, играат подобро од претходните и тоа е голем плус за нив. Убаво е кога се победува, особено на гостински терен. Нашата форма оди во нагорна линија, одлично се подготвуваме, играме добро и нема зошто да не веруваме дека ќе победиме на овој меч. Свесни сме дека нè очекува тврд и тежок натпревар, против цврста екипа со добри голмани, но пак ќе речам сите веруваме во победа“, рече искусниот Ојлески.
Натпреварот во арената „Боро Чурлевски“ во Битола е со почеток во 18.45 часот.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
