Македонскиот Центар за Култура и Развој и Фудбалската федерација на Македонија на прес-конференција ги презентираа активностите повзани со одбележување на ФАРЕ АКЦИОНАТА НЕДЕЛА 2017 – за борба против расизмот, национализмот и сите форми на дискриминација во фудбалот.
„МЦКР како национален ФАРЕ координатор, традиционално секоја година ја организира ФАРЕ Акционата недела во соработка со Фудбалската федерација на Македонија. Оваа година акционата недела се организира во 50 земји со повеќе од 2.000 активности насочени кон кревање на свеста за инклузивно општество и надминување на сите видови на дискриминација во спортот, особено во фудбалот како најпопуларна планетарна игра. Оваа година една од темите на ФАРЕ Акционата недела е инклузија на бегалците на европскиот континент и МЦКР како своја посебна активност ќе организира „Фестивал за интеграција на бегалците преку фудбалот“ – истакна Нелко Нелковски, претседател на МЦКР, на кого се надополна и генералниот секретар на ФФМ, Филип Поповски:
„Фудбалската федерација на Македонија го искажува своето задоволство од соработката со Македонскиот Центар за Култура и Развој и се вклучува во одбележувањето на ФАРЕ Акционата недела во фудбалот. На сите натпревари од Првата фудбалска лига во колото кое ќе се одигра на 14 Октомври, пред почетокот на натпреварите ќе бидат истакнати пароли со содржина „НАЦИОНАЛИЗМОТ И РАСИЗМОТ НАДВОР ОД ФУДБАЛОТ„ и ќе бидат покажани црвени картони со ист натпис, од сите учесници во натпреварот – играчите на двата тима и судиите. ФФМ постојано посветено работи во надминување на сите аномалии во фудбалот, преку целата година со различни активности на сите нивоа“.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
