Фенербахче повторно влегува во ритам во клучниот дел од сезоната, откако актуелниот европски првак стигна до голема победа во Евролигата, на гостински терен против Реал Мадрид со резултат 83-86. Тимот на Жељко Обрадовиќ фуриозно почна, поведувајќи со двоцифрена предност по само пет минути, но „кралевите“ уште до крајот на полувремето го свртеа резултатот во своја полза, поведувајќи со 45-40. Клучниот пресврт сепак беше направен во второто полувреме, кога Фенербахче најпрвин се одлепи, а потоа го издржа завршниот налет на домаќините за конечна победа од 83-86.
Слукас со 20 и Датоме со 17 поени беа клучни играчи во триумфот на актуелниот европски шампион, а најефикасни кај Реал Мадрид беа Керол со 15 и Дончиќ со 14 поени.
Големото грчко дерби меѓу Панатинаикос и Олимпијакос по огромна битка беше решено по продолжение од пет минути, со триумф на гостинскиот тим од 85-87. ПАО се врати од двоцифрена негатива и ја доби последната четвртина со 21-9, носејќи го мечот во продолжение, но Калатес не можеше сам да ја донесе победата, па „црвено-белите“ си заминаа како победници од ова жешко гостување.
Брајан Робертс со 18 поени (4/4 за тројка) беше најефикасен кај Олимпијакос, пред Принтезис и Спанулис со по 15 поени. Ник Калатес го заврши мечот со 23 поени и 10 асистенции за Панатинаикос, што сепак се покажа премалку за да се земе скалпот на големиот ривал.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
