ФИФА започна со продажба на официјални билети за паркирање за натпреварите од Светското првенство во 2026 година по цени кои се движат од 75 до 175 долари дневно, што е повеќе од цената на некои билети од претходните турнири. Паркирањето на тој начин станува уште еден извор на приход за ФИФА, заедно со веќе рекордно скапите билети што се во продажба од минатиот месец.
Организирањето на натпреварите во САД, Мексико и Канада веќе предизвикува проблеми поради логистиката и ограничените опции за јавен превоз. Повеќето американски стадиони, кои се користат за НФЛ, се опкружени со големи паркинзи, но дел од просторот ќе биде затворен од безбедносни причини или резервиран за ВИП гости и зони за угостителство.
Ова значително ќе го намали бројот на достапни места, па затоа ФИФА ја користи побарувачката нудејќи билети за паркирање по цени споредливи со оние за Супербоул. На пример, на стадионите во Мајами, Далас, Канзас Сити и Бостон, паркирањето за групната фаза чини 75 долари, додека за полуфиналето и натпреварот за третото место, цената се искачува на 175 долари. За споредба, билет од трета категорија за групната фаза на Светското првенство во Катар 2022 година чинеше 69 долари – помалку од паркирањето четири години подоцна во САД.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
