Антонио Конте нема по добро да го памети својот прв калчолигашки меч на клупата на Наполи откако претрпе пораз на гостувањето против Верона од 3-0. Јасно беше дека „наполитанците“ ќе се мачат на стартот од сезонава поради проблемите во преодниот рок и недоаѓањето на нов врвен голгетер додека Осимен е надвор од тимот, а Конте очигледно е далеку од решение за овие проблеми.
За главоболките да бидат уште поголеми, Кварацкелија се повреди на дуелот со Верона и мораше да биде заменет, а Наполи без својот најдобар играч е мачеше да го загрози противничкиот гол. Верона на спротивната страна знаеше како да ги искористи своите шанси, поведувајќи преку Ливраменто со 1-0.
Ансигуа ја погоди гредата со удар од дваесетина метри во најубавата шанса на Наполи во вториот дел, а Верона до крајот успеа да постигне уште еден гол, откако Москера ја казни заспаноста на одбраната на гостите и ја смести топката во мрежата за 2-0. Гостите од Неапол капитулираа и се предадоа во финишот, а Верона го искористи тоа за да постигне и трет гол, втор за „резервистот“ Москера кој цел живот ќе го памети својот прв меч во дресот на „веронезите“.
Во вториот натпревар што почна од 18.30 часот Болоња и Удинезе ремизираа 1-1. Орсолини од пенал ја доведе Болоња во водство во 57. минута, а „фриулијаните“ израмнија единаесет минути подоцна преку Џанети, откако Скорупски го одбрани пеналот на Тован.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
