ФИНСКА – вториот дебитант на ЕВРО 2020, покрај Македонија

Во рамките на медиумската „експертска мрежа на Гардијан“ за EВРО 2020, чиј дел е и ЕКИПА, заедно со вкупно 22 европски медиуми меѓу кои и со „Газета дело Спорт“ (Италија), „Ел Паис“ (Шпанија), „Ди Цајт“ (Германија), „Франс фудбал“ (Франција), „Блик“ (Швајцарија)…, ви ги пренесуваме комплетните информации за сите репрезентации учеснички на Европското првенство 2020.

На ЕВРО 2020 денеска стартуваат и натпреварите од Групата Б, каде Финска ќе го има дебито на еден европски шампионат, а за ривал ќе ја има селекцијата на Данска.

За ЕКИПА пишува Саку Пека Сунделин од „Илта Саномат“

Твитер профил: @SPSundelin

Гледајќи наназад пет години, немаше многу знаци дека Финска наскоро ќе се квалификува на едно големо натпревараување. Во 2016 година, под палката на Ханс Бак, поранешен асистент на Свен-Горан Ериксон, Финска не победи на ниту еден натпревар. По една деморализирачка година, тие се свртеа кон Марку Канерва, кој веќе двапати беше привремен менаџер.

Не се очекуваше многу од поранешниот просветен работник, кој ја претставуваше Финска како централен бек и речиси и да немаше тренерско искуство на клупско ниво. Но, тогаш се случи нешто чудно: Финска започна да победува. Прво ја освоија групата во Лигата на нации пред Унгарија и Грција, а потоа се пласираа на Европското првенство.

Јадрото на тимот е многу познато на Канерва, бидејќи Финска под негово менаџирање се квалификуваше на Европското првенство за играчи до 21 година во 2009 година. Потребна беше скоро една деценија за да го исполнат својот целосен потенцијал и иако можеби не е најдобрата генерација на играчи, тоа е секако најдобриот тим што го има Финска, со посебна  поврзаност и тимски идентитет на теренот и надвор од него.

Селекторот на Ирска, Стивен Кени, по поразот на неговиот тим од Финска минатиот октомври рече: „Тие се скоро како клупски тим по тоа што се многу сигурни во своите улоги“. Канерва беше задоволен од комплиментот, велејќи: „Тоа покажува дека ефикасно го користиме малото време што го имаме заедно. Многу играчи се со нас подолго време и ги знаат принципите на овој тим. Сега мора да се концентрираме на малите нијанси “.

Тоа е луксуз за една репрезентација. Во Финска се шегуваат дека Канерва е толку лут од деталите што секогаш дознава каде се наоѓаат прскалките пред натпреварот. Формацијата често може да се смени од 5-3-2 во 4-4-2 и флексибилноста на тимот е една од неговите предности

Финска е толку организирана и може да биде здодевно да се игра против нив. Клучот е често во тоа како функционираат заедно голманот Лукас Храдецки и двајцата централни бекови Паулус Арајури и Јона Тоивио. Глен Камара е мотор од средниот ред, додека Тиму Пуки во нападот е поддржан од Робин Лод во контранападите, а Џоел Појанпало е исто така способен да постигне гол.

Клучот, сепак, е тимскиот дух. Играчите се многу опуштени во друштво и некои од нив рекоа дека состанокот со остатокот од тимот е како да сте го виделе вашето семејство по долго време. „Сите многу се почитуваат“, рече Паулус Арајури. „Спортот на ова ниво е егоистичен, но ние сме повеќе од колеги, ние сме пријатели“.

ТРЕНЕРОТ

Марку е многу вообичаено име за финските мажи родени во 1950-тите и 1960-тите. Канерва беше избран во 2009 година откако го предводеше тимот за фудбалери до 21 година на Европското првенство. Селекторот на Финска е тактички човек кој минува цели денови на својот лаптоп анализирајќи ги противниците.

„Еден ден започнав во 9 часот наутро и работев и работев, а во 22.30 часот забележав дека сум малку гладен и веројатно треба да вечерам“, рече тој за весникот „Илта-Саномат“.

Канерва е навивач на Арсенал, кој сака да игра тенис и падел.

ИКОНА

Тиму Пуки беше следната голема работа во Финска уште пред 2008 година кога го напушти КТП за Севилја. Тој одигра само еден натпревар во лигата за шпанскиот клуб и изгледаше предодреден да не го исполни својот потенцијал. Всушност, честопати го правеа жртвено јагне за националниот тим, дури и кога играше добро.

Сега сето тоа се смени и ако прашате некој во Финска да именува некој од нашите фудбалери, најверојатно ќе каже Пуки. Откако го постигна својот прв хет-трик во Премиер лигата во дресот на Норвич, тој отиде директно дома да ја чува својата ќерка, замолувајќи ја сопругата да му дозволи да излезе на вечера со пријателите.

ВЕРОЈАТЕН СОСТАВ (5-3-2): Храдецки, Уронен, Арајури, Тоивио, Раитала, Л. Визисен, Камара, Спарв, Лод, Пуки, Похјанпало.

БЛАГОДАРЕН ЗА ОДЛОЖУВАЊЕТО НА ЕВРО 2020

Стартната постава веројатно ќе беше скоро истата ако турнирот се играше пред една година, но изгледите за напаѓачот Маркус Форс се многу посветли отколку пред 12 месеци. Во јануари 2020 година тој ја повреди ахиловата тетива додека беше на позајмица во АФЦ Вимблдон и не играше до крајот на годината, но оваа сезона ја заврши успешно, постигнувајќи го победничкиот гол, натпревар во кој Брентфорд го победи Борнмут во плеј-офот од полуфиналето на Чемпионшип-дивизијата.

ШТО ПЕАТ ФАНОВИТЕ: 

Ако сме искрени, мора да признаеме дека културата на пеење на репрезентативните натпревари е релативно нов феномен. Поминавме долго време само плескајќи ги рацете без никаков ритам кога ќе беше досуден корнер за Финска. Но, пеењето навистина се подобри и е одлично овие денови.  “Oi Suomi on!” “ е главната песна што ќе се слушне на стадионот „Паркен“ во Копенхаген или на стадионот „Санкт Петербург“. Тоа оди вака: „Ох Финска е, Ох Финска е, Ох Финска е прекрасна земја. Имаме сауна, алкохол и секири, ох Финска е прекрасна земја “.

ШТО ВЕЛАТ ФАНОВИТЕ: 

– „Eteenpäin on menty“ – Поминавме во следната фаза

–  „Lopussa saatiin kulma“ – На крајот добивме корнер

– „Hävittiin kenelle pitikin“ – Изгубивме против тим против кој очекувавме да загубиме

– Како што можеби сте забележале, Финците имаат тенденција да бидат малку песимистички расположени.

ПАНДЕМИСКИ ХЕРОЈ

Тренерот читаше приказни, лични искуства на интернет за деца од градинка. Канерва претходно беше самиот наставник и беше амбасадор на кампањата за поттикнување на финските деца да читаат повеќе. Тој исто така рече дека е време да се зголемат платите за наставниците за да не ја напуштаат наставата за други работни места.

„Часовите стануваат сè поголеми, а работата е поисцрпувачка“, рече тој пред финскиот синдикат за образование, ОАЈ. „Знам дека неколку луѓе се преселија во други области на работа. Нивните плати мора да одговараат на нивното образование и барањата на нивната работа “.