Фудбалерите на Шкупи загубија на домашен терен со 1-2 од Силекс во натпревар од Првата македонска фудбалска лига.
По мечот тимот од Чаир излезе со реакција на судиската тројка на мечот, поради тоа што гостинскиот тим дал гол од офсајд со кој израмнил на 1-1.
Во продолжение ви го пренесуваме целото соопштение на ФК Шкупи.
„Како ново раководство на ФК Шкупи кое веќе неколку месеци ја презеде одговорноста да го води клубот, секогаш сме го избирале патот на смиреноста и посветеноста на фер игра. Не го кренавме гласот, дури и кога бевме сведоци на очигледна неправда. Покажавме трпение и почит кон институциите и покрај тешкотиите и контроверзните одлуки кои често директно влијаеја на текот на нашите натпревари.
Сепак, она што се случи денеска на мечот против Силекс е недозволиво. Грешките се дел од играта, разбираме контроверзни позиции надвор од играта или брзи одлуки во тешки ситуации. Но, конкретниот случај, кога Силекс успеа да извлече 1-1 преку гол на асистенција со скандалозна судиска одлука, ги надминува сите граници на толеранција.
Бараме сериозно и итно размислување од сите инстанци на Фудбалската федерација на Македонија, од највисоките органи до Судиската комисија и самите судии кои се одговорни за доброто на играта. Фудбалот заслужува искреност, транспарентност и почит за жртвите што ги прават клубовите, играчите и навивачите.
ФК Шкупи ќе продолжи достојно да се бори на теренот, но повеќе нема да молчиме пред ваквите неправди“, стои во соопштението на Шкупи.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
