Најтрофејниот македонски фудбалски клуб Вардар го претрпе седмиот пораз во сезоната, четвртиот во низа откако загуби на гостувањето кај Беса 1976 со 2-1 во 10. коло од елитниот македонски фудбалски шампионат.
Ден по одиграниот натпревар на социјалните мрежи скопскиот тим објави видео од прекршок во шестнаесетникот над Џибрил Дианеси, прекршок за кој Вардар вели дека е оштетен за пенал. Од раководството на клубот се пожалија и на помошниот судија Мартин Петковски кој по втор пат го оштетува клубот оваа претсезона и воедно побараа реакција од ФФМ.
„На вчерашниот натпревар против екипата на Беса Добри Дол, ФК Вардар беше сериозно оштетен од страна на помошниците на главниот судија Јован Качевски.
Имено, во второто полувреме од натпреварот, во шеснаесетникот на противничката екипа, врз фудбалерот на Вардар Џибрил Дианеси беше направен очигледен, свесен прекршок, кој директно влијаеше врз играта, шансата за погодок, а секако и врз конечниот резултат.
За жал, оваа и повеќе од очигледна ситуација не беше доволна причина за помошниците на Јован Качевски, кои од неразбирливи причини останаа неми и не му сигнализираа на главниот судија дека има очигледен прекршок, по кој требаше да биде досуден пенал во корист на ФК Вардар.
Ваквите пропусти се недозволиви, особено кога се повторуваат во континуитет, бидејќи истиот помошник судија Мартин Петковски, во два наврати оваа полусезона, како на натпреварот против екипата на Силекс, така и сега против екипата на Беса Добри Дол, во идентична ситуација, не сигнализираше прекршок за пенал во корист на ФК Вардар.
Затоа бараме ФФМ најостро да реагира и да ги спречи ваквите пропусти, со кои директно се нанесува штета на клубовите, на самата лига, а секако и на мак фудбалот во целост“, стои во објвата на ФК Вардар.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
