Селекторот на француската репрезентација, Дидие Дешам, изјави дека чека нови информации од медицинскиот тим за повредата на глуждот на Килијан Мбапе пред квалификациите за Светското првенство.
Мбапе го напушти теренот на крајот од натпреварот во кој Реал Мадрид го победи Виљареал со 3-1 во саботата. Веднаш по постигнувањето на третиот гол за својот тим, францускиот напаѓач падна на тревата, се фати за десниот глужд, а потоа полека го напушти теренот без помош на некој друг.
„Во моментов немам никакви дополнителни информации. Како и секогаш, ќе биде објавено соопштение, без оглед на тоа за кој играч или клуб станува збор. Разговарав со него, има мал проблем, но да беше посериозен, немаше да дојде денеска. Ќе почекаме проценка на медицинскиот тим и ќе видиме како ќе се развива ситуацијата“, рече Дешам на прес-конференцијата.
Во петок, Франција го пречекува Азербејџан на „Паркот на принцовите“ во Париз, додека во понеделник му гостува на Исланд во Рејкјавик. „Триколорите“ се лидери во групата Д со две победи на почетокот од квалификациите.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
