Фудбалската асоцијација на Англија наводно се договорила со сопственикот на Фулам и на Џексонвил јагуарс да му го продаде „Вембли“ за околу 600 милиони фунти. Преговорите почнале уште во април годинава. Според тврдењата на релевантни британски медиуми договорот меѓу ФА на Англија и Кан веќе е постигнат, а треба да добие потврда утре на седница на бордот на асоцијацијата.
Според договорот, новиот сопственик не би имал право маркетиншки да го брендира стадионот, ФА на Англија ќе може и натаму да организира натпревари на англиската репрезентација на „Вембли“, а ќе си го преземе сопствеништвото назад во случај ако Кан биде уапсен или осуден за криминал.
Ако договорот биде едногласно усвоен на состанокот на бордот на ФА на Англија, тогаш ќе биде презентиран на широкиот совет на федерацијата кој го сочинуваат претставници од аматерскиот фудбал па се до Премиер-лигата. И тие треба да го прифатат договорот.
Идејата за купувањето на „Вембли“ кај Кан потегнува од желбата да донесе натпревари од НФЛ – лигата во Лондон. Тој сака и да формира франшиза чиј дом ќе биде легендарниот англиски стадион.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
