Поранешниот јуниорски репрезентативец и капитен на старо новиот член на најквалитетното домашно ракометно натпреварување, Голден Арт, Глигор Гајиќ го продолжи договорот со клубот за наредните две години. Стружанецот пристигна во Голден Арт во јуни 2020 година и притоа се профилираше во еден од носителите на играта на тимот, а со својата посветеност, професионалност и верност, од стартот на последнава сезона го заслужи и статусот, капитен на клубот.
„Задоволен сум што ја остваривме целта и експресно се вративме во супер лигата, чест ми е што ја продолжуваме соработката со клуб кој премногу вложува во македонските играчи и придонесува за развојот на ракометот во Македонија. Гледам само позитивно и оптимистички за иднината на клубот во супер лигата, ќе работиме напорно, професионално и заедно чекориме кон нови успеси во супер лигата“ – изјави Гајиќ по потпишувањето на новиот договор.
Глигор Гајиќ својата ракометна кариера ја стартуваше во родната Струга, од каде премина во скопски Металург, а последните две години настапуваше за Голден Арт. Договорот со тимот на Голден Арт е со важност до јуни 2024 година.
Со овој потег и склучување на соработка со Гајиќ, Голден Арт покажува дека, како и до сега и во иднина ќе ги вреднува македонските играчи, давајќи им можност за надградба и формирање на истите при настап во највисок ранг на натпреварување.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
