Шкендија оствари убедлив триумф (1-6) во градската пресметка со Ренова, и со стил ја прослави есенската титула во македонскиот шампионат. Со новите три бода, тимот на Ќатип Османи прокнижи 43 бода по 17 одиграни кола и е недостижен на врвот до крајот на овој прв дел од сезоната. Одличната претстава воедно беше и подарок за јубилејот на навивачката група „Балисти“, која на овој меч прослави 25 години од постоењето.
Бесарт Ибраими уште во третата минута го отвори резултатот во корист на Шкендија, Ферхан Хасани од пенал зголеми на 0-2 во 25.минута, а Ибраими потоа повторно стрелаше во 33.минута.
Гол-шоуто продолжи и во второто полувреме. Ненад Мишковски постигна гол за Ренова во 47.минута, но веќе во следниот напад возврати Стенио Жуниор за 1-4.
Во завршницата Шкендија постигна уште два гола. Шефит Шефити во 81.минута беше стрелец на петтиот гол, а серијата ја затвори капитенот Ферхан Хасани.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
