Хрватска славеше на контролниот натпревар со Македонија одигран синоќа во Вараждин, а селекторот Дагур Сигурдсон не криеше дека е незадоволен од одредени аспекти во играта на „коцкестите“ на овој дуел.
Домаќините беа ослабени поради неиграњето на неколку стандардни ракометари, а Сигурдсон веднаш по натпреварот откри и лоша вест – проблемот со Лука Циндриќ е сериозен и поранешниот ракометар на Вардар би можел и целосно да го пропушти претстојниот мундијал.
„Точно е дека победивме против Македонија, но има многу работи од кои не сум задоволен, некои делови од нашата игра беа катастрофални и ќе мораме да ги отстраниме тие грешки. Што се однесува до играчите кои не настапија, Кларица и Граховац ќе играат на следната контрола со Словенија, а Лука Циндриќ сигурно ќе го пропушти и овој натпревар. Таква е ситуацијата, Циндриќ цел месец декември нема тренирано, уште не е во ритам, прашање е дали ќе биде подготвен и воопшто да настапи на овој светски шампионат“, изјави селекторот Сигурдсон.
Хрватска е дел од групата Х што ќе се игра во Загреб, а противници на „коцкестите“ во првата фаза ќе бидат селекциите на Египет, Аргентина и Бахреин.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
