Францускиот фудбалер Килијан Мбапе ќе мора да оди на операција на носот. Новиот напаѓач на Реал Мадрид заработи повреда на крајот од мечот со Австрија кој им припадна на „триколорите“ со 1-0.
Мбапе во обид да упати удар со глава, со носот удри во рамото на Кевин Денс, по што тој остана да лежи. Му беше укажана лекарска помош, а набрзо местото на теренот му го отстапи на Оливие Жиру.
Дидие Дешамп по натпреварот изјави дека ситуацијата не е добра и дека Мбапе најверојатно го скршил носот, по што потврда стигна од Француската фудбалска федерација. Мбапе ќе биде опериран во Дизелдорф, а се уште не е познато дали ќе мора да се повлече од Европското првенство.
Следниот натпревар Франција го игра против Холандија на 21. јуни од 21 часот во Лајпциг.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
