Натпреварот со Австрија треба да биде зад нас. И покрај поразот јас сум оптимист дека можеме да стигнеме до позитивен резултат против Украина.
Доколку сакаме да триумфираме против Украина ќе мора да ги поправиме грешките од првиот натпрвеар во одбраната. Не смееме да дозволиме да бидеме казнети како на мечот со Австрија. Одбраната мора да одигра цврсто, а наша шанса треба да бидат контранападите. Мојот пријател Андриј Шевченко направи одлична атмосфера во репрезентацијата на Украина. Тие играат убав и напаѓачки фудбал и затоа мораме да биде многу сконцентрирани во одбраната.
По тоа што го дознавам од Украина тие нас многу не почитуваат. Знаат дека имаме одлична генерација и во ниту еден момент нема да не потценат.
Нивни најдобар фудбалер е Андриј Јармоленко со кого играв заедно во Динамо Киев. Сака да игра еден на еден. Би го посеветувал Езгијан Алиоски да пази на неговата лева нога. Најчесто сака да оди кон голот и има многу брз прв дриблинг. Многу ќе биде подобро да го остава да оди на центаршут, отколку да нападне кон шеснаесетникот каде што е најопасен.
Покрај Јармоленко голема опасност за нашиот гол ќе биде и Олександр Зинченко кој имаше неверојатна сезона во Манчестер Сити.
Голманот Бушчан игра неверојатно во последно време. И покрај киксот што го направи при последниот гол на Холандија, тој во неколку наврати спасуваше чисти голови. Феноменално бранеше и на мечот против Франција во квалификациите за Светското првенство во кое Украина успеа да извлече бод. Кога бев во Динамо Киев тој беше млад голман, но во минатите години прерасна во одличен чувар на мрежата. Бранеше за У21 репрезентацијата на Украина во квалификациите за ЕВРО 2017 кога ние се пласиравме во завршницата. Го гледав и во Скопје во тие квалификации и морам да кажам дека мораме да ја искористиме секоја шанса и да не го разбраниме.
Украинците се големи фанатици. За народот во оваа земја репрезентацијата е светост. Кога играв во Украина во шампионатот знаеше на некои мечеви да не бидат исполнети стадионите, но кога беше во прашање репрезентацијата нема човек кој не гледа фудбал.
Многу е важно да не и дозволиме на Украина да поведе, бидејќи на вакви натпревари многу е важно кој прв ќе постигне гол. Се виде тоа и на мечот со Австрија. Иако се вративме во игра, грешните замени во вториот дел и подобрата физичка подготвеност на Австријците на крај не чинеа. Очекувам одличен натпревар и се надевам дека на крајот ние ќе се радуваме.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
