Во очекување на најголемиот настан за македонскиот фудбал во историјата, првото учество на најдобрата национална репрезентација на Европско првенство, ЕКИПА издвојувајќи ги најзначајните фудбалери, личности и настани од нашата фудбалска историја, се до 11. јуни преку серијал-текстови како најава за тоа што ги очекува Горан Пандев и соиграчите на УЕФА Евро 2020!
======================================================================================================================================
Поранешниот македонски фудбалски репрезентативец и еден од најдобрите левокрилни дефанзивци кои ги имала нашата земја во историјата, Горан Попов не крие дека силно верува во оваа генерација репрезентативци која може да ни донесе и уште поголеми успеси, од веќе обезбедениот пласман на првото историско европско првенство.
Попов е сигурен дека избраниците на Игор Ангеловски може да се пласираат во втората фаза од ЕВРО 2020.
„Верувам во оваа генерација македонски фудбалери. Покажаа дека сите заедно дишат за Македонија и дека атмосферата во репрезентацијата е на големо ниво. Како игра репрезентацијата во последно време, а посебно ако го издвоиме и натпреварот со Германија, верувам дека можеме да ја поминеме групата на Европското првенство. Генерацијата предводена од капитенот Горан Пандев покажа дека од ниту еден противник не се плаши и дека со секого може и сака да се надигрува“, го почна разоговорот за ЕКИПА, Горан Попов.
СРЕДНИОТ РЕД Е НАЈСИЛНОТО НАШЕ ‘ОРУЖЈЕ’, ОДБРАНАТА Е ПОСЛАБА ОД ОНАА ОД МОЈАТА ГЕНЕРАЦИЈА
Тој смета дека средниот ред предводен од Енис Барди и Аријан Адеми е најдобриот во историјата. Додава дека веројатно одбраната е најслабата алка, бидејќи особено Дарко Велковски се соочува со многу проблеми и не е стандарден во својот тим.
„Енис Барди и Аријан Адеми се моторот на оваа наша репрезентација. Имаме среден ред како никогаш досега во историјата. Мојата генерација и одбраната која ја имавме тогаш, да имаше средина како оваа сега, многу лесно можевме и ние да играме на големо натпреварување. Морам да бидам искрен дека во мојата генерација со Новески, Васовски, Седлоски, Игор Митревски, одбраната беше подобар дел, ако се споредува со актуелниот тим. И да не бидам погрешно разбран. Не обвинувам никого. Го гледате Велковски одигра неверојатно на мечот против Германија една од најдобрите одбранбени партии, но за жал има многу проблеми со повреди и не е стандарден во својот клуб. Навистина ми е криво бидејќи и тој е одличен фудбалер. Алиоски кој игра на мојата позиција е еден од најдобрите наши фудбалери. Дефанзивно знае некогаш и да направи грешка, но сето тоа го поправа со неговата голема пожртвуваност и борба“, дополнува Попов.
Поранешниот репрезентативец смета дека многу значи за нашата репрезентација тоа што сите играчи играат во најсилните лиги во светот и поради тоа немаат респект кон ниту еден противник, проблем со кој се соочувале некои претходни генерации.
„Силата на овој тим е и во тоа што сите фудбалери играат во најсилните лиги во Европа. Секоја недела имаат силни натпревари против најдобрите фудаблери во светот и затоа не респектираат никого. Затоа верувам дека можеме да направиме голем успех. Нашата шанса против сите репрезентации е да одиграме цврсто во одбраната и на контри да се обидеме да ги изненадиме. Мислам дека рецептот за успех е да одиграме како против Германија. Доколку одбраната биде на ниво како на тој меч, сигурен сум дека ќе играме во нокаут фазата“ – вели Попов.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
