Многумина во светот на Формула 1 шпекулираа дека Луис Хамилтон би можел да се пензионира веднаш по ‘губењето’ на рекордната осма титула во контроверзното финале во 2021 година во Абу Даби. Хамилтон, сепак, остана во Формула 1, но сега не го крие фактот дека размислувал да се пензионира по Абу Даби во 2021 година.
Во тој период многупати изјави дека „многу работи му поминуваат низ глава“, што дефинитивно сугерира пензионирање. Сега, пак, во своето прво појавување во јавноста како возач на Ферари, Хамилтон јасно стави до знаење дека нема да размислува за пензионирање, дури и ако ја освои својата осма титула. Хамилтон објасни дека неговата мисија во 2025 година е првенствено да ја освои својата прва титула со Ферари, а не неговата осма севкупна титула.
„За мене тоа е прва титула, доколку ја освојам. Освојувањето на титулата со Ферари е она што го сакам. За тоа размислувам, а не за бројот осум. Размислувам за првата титула што ќе ја освои овој тим по долго време. Ферари има богата историја со многу шампионски титули, но сега сакам да придонесам за таа историја и да им помогнам повторно да ја освојат титулата“ – вели Хамилтон.
На прашањето дали е поголем оптимист, од било кога претходно, за освојување на осмата титула во 2025 година, Хамилтон со одговор:
„Да…. да…. Секој тим во историјата на Формула 1 има свои подеми и падови, а понекогаш, и покрај одличните тимови, резултатите не се совпаѓаат сосема. Сега силно верувам во титула“, вели Хамилтон, и дополнува:
„Конкуренцијата е тешка, но имам одличен тим, енергијата што ја чувствувам од тимот е неверојатна. Ќе работиме заедно, верувам дека тука има магија“.
Ферари има големи амбиции, тимот одлучи да инвестира во сосема нов SF-25 за последната сезона од сегашните технички правила, а првите тестови сугерираат дека болидот е веќе 0,4 секунди побрз од својот претходник. Со оглед на новиот пристап и одлучноста на Хамилтон, Ферари би можел да ги има сите потребни ресурси за да се врати на врвот, а 2025 година ќе биде клучна за остварување на тие амбиции.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
