Барселона во последните месеци покажуваше сериозен интерес за Луис Дијаз, но трансферот на крилниот офанзивец на Ливерпул во редовите на каталонскиот гигант дефинитивно нема да се реализира. Главен „виновник“ за тоа е тренерот Ханси Флик, кој отворено се спротивставил на идејата колумбискиот фудбалер да му биде доведен како главно засилување за наредната натпреварувачка сезона.
Спортскиот директор Деко бил човекот што инсистирал на доведување на Дијаз на „Камп ноу“, дури и почнувајќи разговори со агентот на колумбискиот репрезентативец. Сепак, Флик останал цврст на ставот дека Колумбиецот воопшто не му е потребен во тимот, сметајќи дека ако веќе се бира нов крилен офанзивец, на Барса би и бил подобар поинаков профил на играч. Флик јасно стави до знаење дека го преферира Нико Вилијамс од Атлетик Билбао, кој е достапен за сума од 60 милиони евра, пониска отштета од она што Ливерпул секако ќе го бара за Луис Дијаз.
Претседателот Лапорта на крајот застанал на страната на тренерот во оваа дилема, давајќи му поддршка на стратегот да има поголемо влијание во одлуките поврзани со новите засилувања во претстојниот преоден рок.
Останува да се види дали Барса ќе успее да го убеди Вилијамс на трансфер, ако се знае дека шпанскиот репрезентативец и минатото лето беше поврзуван со преселба на „Камп Ноу“, но на крајот сепак се реши да остане во Атлетик Билбао.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
