Роберто де Зерби минатото лето од неколкуте понуди ја избра онаа на Олимпик Марсеј, почетокот на авантурата беше ветувачки, но како што одминува времето, така се зголемуваат и главоболките на овој стручњак.
Тимот влезе во серија слаби резултати, а Де Зерби реши вината да ја насочи кон екипата, па така по последниот пораз за казна го врати автобусот во клупската база и сите играчи наместо во своите домови, спиеја во карантин. Нивниот однос го допре дното веќе наредниот ден, кога Италијанецот пристигнал во базата и им соопштил дека воопшто не сака да води тренинг со нив.
Играчите не му останале должни, порачувајќи му дека и тие не сакаат да тренираат за него и неговиот стручен штаб, по што морал да реагира спортскиот директор Бенатија. Кризата била намалена само на момент, односите меѓу тренерот и играчите се уште се крајно негативни, а француските медиуми најавуваат дека Де Зерби никогаш не бил поблиску до отказ.
Тој беше бесен и на медиумите, денеска обвинувајќи ги новинарите дека „го претставуваат само него како лошиот во ситуацијата“. Едно е јасно, ако Олимпик наскоро не влезе во победничка серија, Де Зерби нема да го дочека крајот на оваа сезона во Марсеј.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
