Спортската 2024 година завршува денеска, бројна со многу радосни и тажни моменти, во зависност од резултатите. Во неа, сепак би издвоиле пет херои кои дефинитивно оваа 2024 ќе ја паметат по добро.
ЛЕОН МАРШАН
Францускиот пливач Леон Маршан дефинитивно беше спортистот кој ги одбележа Летните олимписки игри во Париз. На најголемата спортска смотра во светот, неверојатниот Французин oсвои четири златни медали и една бронза. Пливачот од Тулуз на базенот во Париз стигнуваше до златниот медал на 200 метри пеперутка, 200 метри градно, како и на трките на 200 и 400 метри мешано. Бронзен медал освои со француската штафета на 4 пати по 100 метри мешано. Маршан со ова достигнување веќе сега влезе на листата на најдобри француски спортисти на сите времиња.
ТАДЕЈ ПОГАЧАР
Неверојатниот словенечки велосипедист, Тадеј Погачар и дефинитивно е еден од спортистите кои ја одбележаа оваа 2024 година. Погачар стана првиот велосипедист во 21 век кој успеал да ги обедини титулите на Тур де франс, Џиро д’Италија, а на тоа да ја додаде и титулата Светски шампион. Словенецот издоминира на двете „гранд трки“ сезонава оставајќи ги ривалите за повече од седум минути. Доминантна трка имаше и на Светското првенство. Останува жал што најдобриот велосипедист годинава, поради мало несогласување со федерацијата на Словенија, не настапи на Летните олимписки игри во Париз.
МАКС ФЕРСТАПЕН
Формула 1 возачот на Ред Бул, успеа да стигне до четвртата во низа титула во најбрзиот циркус во светот. Иако, не беше доминантен како во претходните две сезони во кои доминираше со Ф1 шампионатот, Ферстапен уште еднаш покажа дека во моментов е најдобриот возач во светот. Иако, повторно на доминантен начин ја почна сезоната, сепак како таа одминуваше, ривалите беа се побрзи. Ландо Норис не само што му дишеше во врат, туку успеа и да го загрози неговото прво место, но со неверојатната трка на „Интерлагос“ во Бразил, Ферстапен уште еднаш покажа зошто е најдобриот возач моментално во светот.
СИМОНЕ БАЈЛС
Oткако поради проблеми со менталното здравје, Симоне Бајлс се повлече од Летните олимписки игри во Токио, таа својот кам-бек го имаше на на Олимпијадата во Париз. Легендарната Американка и една од најдобрите спортистки на сите времиња, освои три златни медали. Таа беше најдобра во прескок и во повеќе бој во индивидуалните настапи, а со Американките стигна до злато и во тимското натпреварување. На партер Симоне Бајлс освои сребрен медал. Со овие четири медали таа стигна до бројката од единаесет на Олимписките игри, од кои дури седум се најсјајни.
AРМАНД ДУПЛАНТИС
Неверојатниот шведски атлетичар, Арманд Дуплантис имаше нова сезона за незаборав. Дуплантис трипати го собори светскиот рекорд во скок со стап за мажи во 2024 година. Новиот рекорд ка на Дуплантис од 6,26 метри на меморијалот Камила Сколимовска во дијамантската лига во август беше 10. пат како тој го соборува светскиот рекорд. Претходно на ЛОИ во Париз, на „Стад де франс“ приреди вечер за незаборав за сите љубители на „кралицата на спортовите“ откако стигна до нов златен олимписки медал, со исто така нов светски рекорд кој во тоа време изнесуваше 6.25 метри. Дуплантис досега во кариерата покрај двата златни медали на ЛОИ, има и две титули светски шампион, а во иднина дефинитивно само небото е граница за ова неверојатно момче.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
