Златан Ибрахимовиќ е без сомнение најголемиот фудбалер во историјата на Шведска. Сепак, пред околу дваесет години, тој се соочи со обвинувања кои навистина го погодија силно. Некои медиуми во Шведска притоа го етикетираа како предавник.
Сето тоа поради обвинувањата дека сакал да и го сврти грбот на шведската репрезентација и да игра за Босна и Херцеговина.
Ибрахимовиќ е роден во Малме, каде што пораснал. Неговото семејство емигрирало од поранешна Југославија во осумдесеттите години.
Без оглед на неговото потекло, тој никогаш немал намера да игра за една од репрезентациите создадени со распадот на таа земја. Но, доколку Југославија останеше заедно, можеби ситуацијата ќе беше поинаква.
Сепак, никогаш немаше реална можност тој да игра за Хрватска, од каде што потекнува неговата мајка Јурка.
Исто така, немаше разговор за играње за Босна и Херцеговина, од каде што е неговиот татко Шефик.
Иако секогаш нагласуваше дека се чувствува како Швеѓанец, се појавија информации што го разбеснија.
Во 2005 година, „Афтонбладет“ ја објави сторијата дека Ибрахимовиќ сакал да игра за Босна и Херцеговина. Наводно, како 17-годишник, кон крајот на деведесеттите години, тој ги понудил своите услуги на Фудбалската асоцијација на БиХ.
Во тој текст, тој бил прикажан како „предавник на Шведска“. Таква етикета силно го погодила, што тој го признава до ден-денес.
„Се чувствувам навредено кога луѓето ја доведуваат во прашање мојата лојалност кон шведската репрезентација. Тоа е непростлив напад врз мене. Само играв за Шведска и постигнував голови. А потоа го добивам ова како шлаканица во лицето.“
Тој, исто така, објасни дека како тинејџер практично не престојувал во Босна и Херцеговина.
„Бев во Босна само еднаш со татко ми, кога имав осум години. Кога бев јуниор, некој од босанската федерација ме праша дали сакам да одам на турнеја со тимот за развој. Немав желба за тоа. Веќе играв за шведската репрезентација до 18 години. Роден сум и израснат во Шведска. Тоа е мојата татковина и мојата земја.“
Тој нагласи дека потеклото не го менува неговиот став.
„Да имаш корени од друга земја е друга работа. Така изгледа светот денес. Никогаш не помислив да играм за која било друга земја освен за Шведска“.
Во статијата се наведени и имињата на тренерите кои наводно преговарале со него и неговиот татко Шефик. Ибрахимовиќ сето тоа го нарече клевета.
Тој рече дека е „вознемирен, тажен и повреден“ поради сè. Додаде дека мора да се брани од вакви напади.
„Постојат имиња на младински тренери за кои никогаш не сум слушнал. Имиња на луѓе од босанската федерација кои никогаш не сум ги сретнал. Тоа е целосно лудо. Сакам оваа лага да заврши. Се чувствувам прогонуван од весниците кои ме прикажуваат како предавник на шведскиот национален фудбал“ – рече тогаш Ибрахимовиќ.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
