Златан Ибрахимовиќ би можел да го напушти Манчестер јунајтед откако беше обелоденето дека ЛА галакси подготвува мегапонуда за да го доведе шведскиот ас пред завршувањето на неговата кариера. Газдите на овој тим важат за многу амбициозни, но и за луѓе кои најчесто ги реализираат своите планови, па така токму ЛА галакси го доведе Дејвид Бекам како прва европска суперѕвезда во МЛС, а потоа и Стивен Џерард кога капитенот на Ливерпул реши да си замине од „Енфилд“.
„Спортс илустрејтид“ објави дека веќе е стартувана првата фаза од преговорите со Ибракадабра, кој има право да разговара со други клубови бидејќи договорот со Манчестер јунајтед му истекува за три месеци. Иако двете страни се задоволни од соработката, Ибрахимовиќ најавил дека ќе почека да го види пласманот на тимот на крајот на сезоната, пред конечно да „пресече“ дали и во следната сезона ќе настапува за тимот на Жозе Мурињо.
Последните информации велат дека Златан би можел да донесе конечна одлука и порано, откако финансиските услови што му биле понудени од страна на ЛА галакси биле фантастични. Станува збор за понуда повисока од онаа на јунајтед, со која Ибракадабра би станал убедливо најплатен фудбалер во МЛС-лигата. Тука е и можноста за живот во Лос Анџелес, наспроти Манчестер, што сигурно ќе биде важен фактор особено за семејството на фудбалерот.
Швеѓанецот викендов ќе почне да ја одработува суспензијата од три натпревари, па нема да настапи за Манчестер јунајтед на четвртфиналниот дуел од ФА Купот против Челси.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
