Ракометарите на Алкалоид продолжуваат да испишуваат нови страници на успехот во клупската историја, откако вечерва го совладаа Баја Маре со 32-25 и се пласираа во полуфиналето од ЕХФ Европскиот куп. Избраниците на Кире Лазаров одиграа максимално зрело, почнаа со цврста одбрана и ефикасен напад, а потоа искусно знаеја да ја сочуваат стекнатата предност и да ја претворат во историски пласман во едно европско полуфинале.
Почните минути беа во знакот на голманот Галевски, кој со три успешни интервенции од самиот старт ги исфрли од ритам романските ракометари. Тоа донесе брза предност од 4-0 за Алкалоид, а додека гостите уште беа во шок македонскиот тим успеа да зголеми на 8-2. Баја Маре за момент намали на четири гола разлика, но Галевски тогаш презеде и поинаква улога, па македонскиот голман со два гола од својата половина ги крена на нозе сите присутни во салата „Автокоманда“. Резултатот во првото полувреме рутински се контролираше, Алкалоид имаше најубедливи плус седум кога Ивановски погоди за 17-10, на одмор заминувајќи со шест гола предност (18-12).
Романците само за момент стигнаа до пет гола разлика на самиот старт од второто полувреме (19-14), Алкалоид имаше одговор и во неколку ситуации „сино-белите“ имаа предност од по осум гола разлика, против немоќните гости кои немаа одговор за мотивираните момци на Кире Лазаров. Победата во ниту еден момент не беше доведена во прашање, предноста беше рутински контролирана се до самиот крај и конечните 32-25, за огромна радост на Лазаров, неговите избраници и сите присутни во салата во скопска Автокоманда.
Галевски го заврши мечот со девет успешни интервенции, а во нападот најефикасни беа Петковски со седум, пред Стојковиќ со пет и Ѓоргиев и Франциско со по четири погодоци.
Противник на тимот на Лазаров во полуфиналето ќе биде норвешкиот претставник Рунар Сандефјорд, кој денеска приреди сензација со елиминацијата на грчкиот фаворит Олимпијакос, со победата од 33-23 во Норвешка со која беше анулирана негативата од „минус шест“ од првиот натпревар во Атина.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
