Дарио Ивановски и Адријана Поп Арсова се победници на денешното 9-то издание на „ХалкЕко Скопје Трча 2025“ на 10 километри, на кое учествуваа околу 1700 атлетичари.
Ивановски патеката ја истрча со време 30:59 минути. Второто место му припадна на Муџахид Мислими, со време 32:22 минути, а третото на Димитар Илиев, со време од 32:35 минути.
Во женска конкуренција, најбрзата Поп Арсова оствари време од 35:35 минути, второто место беше за Билсерин Сулејман со 35:58 минути, а на третото место заврши Невена Јовановиќ со 36:58 минути.
Во категоријата учесници со телесен инвалидитет, која беше новина на годинешново издание на трката, од вкупно 12 пријавени, победници се Габриела Стојановиќ во женска конкуренција со време 59:28 минути и Зоран Јовановски во машка конкуренција со време 01:06:21. Второто место во женска конкуренција со време 01:10:42 го освои Јелена Трајковиќ, а Елизабета Симева Јовановска беше трета со освоено време 01:14:20. Александар Јовановски со време 01:11:56 го освои второто место, а со време 01:12:45 третото место му припадна на Шукри Мемеди.
Трката започна и заврши пред фонтаната Лотос, а 10 километри долгата патека по која се трчаше беше по булеварот „Илинден“ и по дел од булеварот „Партизански Одреди“.
Трката се одржа со цел да се промовира активен и здрав живот, како и инклузивност во спортот, а настанот ја зацврсти својата позиција како еден од најзначајните спортски настани во регионот.
И годинешново 9-то издание на „ХалкЕко Скопје Трча 10 км“ не беше само спортски настан, туку и важен момент за афирмирање на спортот и инклузивноста во општеството. Учеството на голем број тркачи, вклучувајќи и лица со телесен инвалидитет, ја нагласија важноста на овој настан како средство за социјална интеграција и промоција на здравиот начин на живот. Публиката која со ентузијазам ги поддржуваше учесниците, насмеаните лица на стартот и финишот, како и спортскиот дух што владееше на патеката, создадоа неверојатна атмосфера.
Организаторите, Сојузот на Спортови на Скопје, во соработка со АК Скопски Маратон и АК Работнички, уште еднаш ја потврдија својата улога во создавањето на настан кој ги обединува сите учесници и ги инспирира за понатамошен развој на спортските активности и позитивни промени во заедницата.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
