Динамо Загреб пропушти одлична шанса да се прилижи до врвот на табелата откако приим гол во 90. минута во големото дерби со Хајдук што на крајот заврши без победник, 2-2.
Во главна улога беше македонскиот интернационалец Стефан Ристовски, кој најпрвин асистираше при првиот гол за Динамо, но во второто полувреме доби црвен картон оставајќи го својот тим на цедило.
„Ова беше дерби полно со тензии, со адреналин, сосема нормална работа за ваков вид на натпревар. Штета е бидејќи имавме 2-1, имавме и игра, но потоа застанавме, можеби момците се исплашија од победата. Дали сум лут за црвениот картон: Не не, секој прави грешки.. Вилфрен Канга, Стефан Ристовски… Тоа а моја грешка, требаше да го повлечам од игра“, изјави Фабио Канаваро.
Италијанскиот стратег е жестоко критикуван поради слабите игри и резултати на Динамо по неговото доаѓање на „Максимир“, па лесно може да се случи легендарниот дефанзивец пред крајот на сезоната да го напушти клубот.
„Тренерската работа е таква, полна со притисок, секој меч е нов предизвик. Јас веќе реков, ако мислите дека треба да си заминам без проблеми ќе се спакувам и ќе си одам. Сепак, треба да ја гледате пошироката слика, да верувате во нешто… Јас можам да гарантирам една работа – нема да се откажам и ќе работам најнапорно до мојот последен ден во Динамо“, порача Канаваро.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
