Легендарниот италијански стратег Фабио Капело тврди дека никој не му создал повеќе проблеми во кариерата од славниот бразилски напаѓач, Роналдо.
Капело и Роналдо соработуваат шест месеци во Реал Мадрид во сезоната 2006/2007, а Италијанецот немаше мир со Роналдо кој, како што вели Капело, пијан доаѓал на тренинзи и натпревари. Сепак, и покрај тоа што имал проблеми со него, за Капело нема дилема дека Роналдо е најталентираниот фудбалер кој го тренирал во својата кариера.
„Најталентираниот фудбалер кој било кога сум го тренирал е Роналдо. Но, во исто време беше фудбалер кој ми создаваше и најмногу проблеми во соблекувалната. Сакаше да се забавува во ноќите и правеше се што не треба. Не ретко и другите фудбалери доаѓаа кај мене и се жалеа дека соблекувалната смрди на алкохол“ – вели Капело.
Италијанецот тврди дека Реал почнал да ниже победи кога Роналдо заминал во Милан.
„Роналдо се пресели во Милан и ние почнавме да победуваме. Сепак, ако ме прашувате за најталентираниот фудбалер кој сум го сретнал, тоа е тој без никаква дилема“.
Роналдо за Реал играше од 2002 до 2007 година постигнувајќи 104 гола на 177 настапи, со освоена и една титула шампион на Шпанија.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА