Осврт со најважните моменти кои го одбележуваат мундијалскиот ден. На вага клучните поенти, случувања, теми и дилеми…, кои вреди да се „измерат“ како заокружување на дневните возбудувања во Катар.
================================================================================
ТЕМА НА ДЕНОТ: Данска, Полска, Белгија…, но и Германија, може да бидат најголемите разочарувања на СП 2022 во Катар!
Дел од европските репрезентации се најголемите разочарувања низ досегашниот тек од Светското првенство 2022 во Катар, за што потврда е токму денешниот ден.
Откако вчера Велс мораше да признае пред САД и Иран, завршувајќи на последното место во Групата Б, денеска Данска повеќе од заслужено е елиминирана од Австралија. На сето тоа повеќе од жална слика на Полска, на теренот против Аргентина, која само среќно успеа да се пласира во осминафиналето пред храбрите Мексиканци, а анализата ја заокружува и зачудувачкиот пораз на моќната Франција од Тунис, без разлика колку и да „петлите“ играа со вториот ред свои играчи а натпреварот резултатски апсолутно ништо не им значеше. Сепак, пораз на Мундијал сигурно не посакуваше и не е мил за никого во редовите на актуелниот светски шампион.
Сето тоа некако кажува, без разлика што Полска продолжува во осминафиналето кое не го заслужи, дека Мундијалот 2022 може да донесе сериозна промена на фудбалската карта во светот. Факт е дека фудбалот не е повеќе само чиста привилегија на Европејците, а јазот меѓу Стариот континент и остатокот од светот очигледно е се помал.
Доказ за тоа ќе биде и утрешниот ден во кој Мундијалот може да остане без уште една моќна европска репрезентација, актуелниот европски вицешампион Хрватска или моќната Белгија која со досегашните игри е тотално разочарување. Една од овие две селекции утре би можеле да го напуштат Катар. Нешто слично како и Германија која ќе мора да го докаже сиот свој квалитет против Костарика ако сака место во осминафиналето.
А, Светското првенство 2022 во петок ќе заврши и за една од европските селекции Србија или Швајцарија. Ако не и за двете…, доколку Камерун не си го искористи фактот дека Бразил веќе е пласиран во осминафиналето!?
ХЕРОЈ НА ДЕНОТ: Метју Леки ја шокираше Данска
Репрезентацијата на Австралија обезбеди пласман во осминафиналето на Светското првенство во Катар, откако во последното 3. коло изненадувачки славеше над фаворизираната Данска со 1-0.
А, херој за Австралијците е Метју Леки кој во 60. минута донесе огромна радост во својата земја. Австралијците долго во ноќта славеа на улиците во своите градови уште еден пласман во нокаут-фаза на Мундијалите по 2006.
РЕКОРД НА ДЕНОТ: Меси е втор кој има два промашени пенали на светските првенства, а Шчесни е втор голман кој одбранил пенал кој самиот го направил
Лионел Меси доби можност да шутира пенал на секој натпревар досега на Мундијалот. Но, се израмни со Асамоа Гиан од Гана како единствени двајца фудбалери на светските првенства во историјата кои промашиле два пенали. Меси досега во Катар има два промашени пенали од пенал, а Гиан имаше два промашен пенали од четири на СП.
Голманот на Полска, Војчех Шчесни, пак, е само втор чувар на мрежата кој одбранил пенал кој самиот го направил, по Жоел Батс за Франција против Бразил на СП 1986.
2 – Wojciech Szczesny n’est que le 2e gardien à arrêter un penalty qu’il a lui-même concédé depuis qu’Opta analyse la Coupe du Monde (1966) après Joël Bats pour la France contre le Brésil en 1986. Pardonné. #POLARG pic.twitter.com/9lkcuEu5NA
— OptaJean (@OptaJean) November 30, 2022
КУРИОЗИТЕТ НА ДЕНОТ: Французите ја завршија низата од 13 едноподруго меча без пораз, Австралија е само трета селекција во историјата која од убедлив пораз во првото коло стигнала до осминафинале
Франција, со неочекуваниот пораз од Тунис (0-1), ја заврши низата од 13 едноподруго меча без пораз на големите натпреварувања (СП и ЕП). Последниот пораз на Французите беше во финалето на ЕП 2016 од Португалија со 0-1 во продолжението.
Австралија, пак, е трет тим кој стигнал до осминафинале а стартувал во првото коло со убедлив пораз со најмалку четири гола разлика. Претходно, тоа им успеа на Југославија на СП 1990 во Италија и на Украина на СП 2006.
ФОТО НА ДЕНОТ: Огромна радост на Австралијците – по 2006 повторно во осминафинале на СП
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
