Фудбалската репрезентација на Англија го заврши настапот на Светското првенство во Русија на четвртото место. Во денешната битка за бронзата, селекцијата на гордиот Албион загуби од Белгија со 2-0. Но, тоа не го разочара капитенот Хари Кејн, кој вели дека Англичаните одиграа одличен Мундијал.
„Генерално, оставивме одличен впечаток. Немојте да заборавите дека оваа Англија не е завршен продукт, дека има уште многу простор за надградба и за подобрување на сите сегменти во селекцијата. Мислам дека и ги надминавме очекувањата на јавноста, иако кога влеговме во полуфиналето желбите и амбициите значително ни се зголемија. Но, едноставно снемавме сили. Белгија поведе многу брзо, ние се обидовме да возвратиме, но момците беа исцрпени. Повеќе од еден месец сме во Русија и заморот веќе е клучен фактор. Но, оваа Англија има сили и знаење да донесе трофеј многу брзо, можеби на следното големо натпреварување“, изјави капитенот на англискиот национален тим, Хари Кејн.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА