Клоп бара евтини „стопери“ – хрватски шестолигаш се јави на „огласот“

Јирген Клоп има големи проблеми со повредени фудбалери сезонава. За малерот да биде поголем во победата над Тотенхем од 3-1, тој го загуби и Жоел Матип. Според првичните информации, камерунскиот дефанзивец има сериозен проблем со скочниот зглоб и ќе паузира најмалку еден месец, што по повредите на Гомез и Ван Дајк го остава Клоп без ниту еден класичен дефанзивец (дури и Фабињо не настапи со Тотенхем поради повреда).

Затоа, не е никакво изненадување што Клоп станува очаен во обидите да донесе нов фудбалер до крајот на преодниот рок. Германецот по триумфот над Тотенхем „пушти оглас“ низ целиот свет – доколку некој тим има евтин и квалитетен „стопер“ веднаш да го побара.

„Неверојатно е што ни се случува со одбраната. Мораме да најдеме нов стопер. Ако знаете некој евтин и квалитетен, пратете ми порака“, изјави Клоп по натпреварот. 

На оваа интересна изјава веднаш се јави хрватскиот шестолигаш Чулинец, кој игра во втората градска загрепска лига, која е шеста по ранг во Хрватска.

„Господине Клоп, имаме ние врвни стопери, но за жал, не се евтини“, напишаа од клубот.