Клубовите едногласно ја отфрлија идејата на МЗТ, КФСМ предлага конечен прекин на сезоната

Кошаркарската федерација на Македонија ќе го достави до Управниот одбор на разгледување заклучокот дека не постојат услови за доигрување на сезоната 2019-20 година. Ова откако Федерацијата прво го дала на изјаснување кај сите прволигашки клубови предлог-планот на МЗТ Скопје Аеродром за комплетирање на првенството. КФСМ ги информирала клубовите за предлогот на актуелниот шампион и побарала да се изјаснат. Федерацијата ги објави поединечните изјаснувања на сите клубови и со исклучок на двата тима од „Јане Сандански“ сите други гласале против.

„Иако во изминатиот период, КФСМ веќе разговараше со претставниците на Здружението на Прва лига-мажи, и постигна едногласна согласност, дека не постојат услови за продолжување на натпреварите во Прва лига-мажи за оваа натпреварувачка сезона, го разгледа предлогот на КК МЗТ Скопје Аеродром, и истиот го постави на изјаснување пред другите претставници на Здружението на Прва лига-мажи.  

Раководството на Кошаркарската федерација на Северна Македонија, ги разгледа сите ставови доставени од страна на претставниците на Здружението на Прва лига-мажи, кои се однесуваат на предлогот на КК МЗТ Скопје Аеродром, за и околу продолжение на натпреварите во Првата лига-мажи за сезоната 2019/2020.

Врз основа на добиените одговори од страна на сите девет клубови, учесници во натпреварите во Прва лига-мажи (покрај МЗТ Скопје Аеродром како предлагач), кои беа едногласни, и ги потврдија претходно изнесените ставови (освен предлагачот, КК МЗТ Скопје Аеродром, и КК МЗТ Скопје Уни-Банка), одлучено е дека, во овој момент не постојат услови за продолжување на натпреварите во Прва лига-мажи.

Согласно со тоа, овој заклучок донесен во консултации со претставниците на сите екипи учесници во натпреварите во Прва лига-мажи, ќе биде доставен и даден на усвојување на наредната седница на Управниот Одбор на КФСМ“ – стои во соопштението од Федерацијата.