Кошаркарската репрезентација на Македонија со денешниот дуел против Полска (18.30 часот, СРЦ Кале) ќе означи крај на квалификациите за Евробаскет 2025, уште еден неуспешен квалификациски циклус во кој нашиот национален тим не успеа да стигне до билет за едно големо натпреварување.
Поразот од Естонија во петокот значеше и дефинитивно губење на шансите за учество на ЕП, а на нашите кошаркари останува денеска против Полска достојно да го завршат овој квалификациски циклус. Станува збор за ривал што веќе го декласиравме на гостински терен со убедливи 71-96, Полска е најслабата репрезентација во нашата група, но како домаќин на Евробаскет има автоматски билет за претстојниот континентален собир.
Полјаците во петокот беа декласирани на домашен терен од Литванија со преубедливи 48-82, дуел на кој не настапија Понитка, Балчеровски и Сочан, кои и денеска нема да бидат дел од тимот против Македонија.
„Знаеме што е потребно за да се слави над Полска, веќе го покажавме тоа со триумфот на нивни терен. Разочарувањето е големо по поразот во Талин и необезбедениот пласман на Евробаскет, но сакаме барем победа за крај, пред нашите верни навивачи. Ќе одиграме максимално за да се покажеме во добро светло и со триумф да го затвориме овој квалификациски циклус“, порачуваат од македонскиот национален тим во пресрет на оваа средба.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
