ЕКИПА во Вараждин,
Стеван Цаневски
Македонските ракометари го искористија вчерашниот ден за опуштање и полнење на батериите пред денешниот последен дуел на СП 2025, во кој избраниците на Кире Лазаров за противник ќе ја имаат големата Франција.
„Триколорите“ се фаворити за медал и на ова големо натпреварување, но македонските ракометари се решени да одиграат без страв, давајќи го максимумот за достојно збогување од овој мундијал на кој Македонија прикажа одличен ракомет.
„Добро знаеме која е Франција, за каква репрезентација станува збор. Се спремавме и ги анализиравме. Сакаме да го дадеме нашиот максимум на последниот меч, да покажеме уште една фантастична игра и да потврдиме дека на ова Светско првенство сите имаа можност да гледаат една друга Македонија која оствари еден добар успех. Секоја поддршка е добредојдена, нема подобро чувство кога гледаме дека цела нација е горда на сите нас. Нивната поддршка ни дава енергија плус да се покажеме во уште подобро светло на секој следен меч. Играме против една селекција која според мене ќе стигне до финале на Светското првенство, играме против мега ѕвезди. Останува да уживаме. Против нив влегуваме без притисок, што пак ќе придонесе да прикажеме уште една добра игра, ќе пробаме да ги намачиме и изненадиме“, ни изјави Ненад Костески.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
