ЕКИПА во Вараждин,
Стеван Цаневски
Ненад Костески даде значаен придонес во одбраната против Унгарија со три украдени топки во првото коло, а десното крило е свесно дека Македонија утревечер ја очекува нов голем предизвик, пресметка со селекцијата на Холандија.
Трилер-завршницата од синоќа мора да биде оставена зад себе, за ракометарите максимално фокусирано да влезат во мечот со „лалињата“ и да се обидат да ги замрсат сметките на уште еден фаворит.
„Заврши таа епизода со Унгарија, ги извлековме добрите работи, лошите ги изолиравме за да ги подобриме. Утре играме со брза, физички исклучително спремна репрезентација. Добро ги анализиравме, подготвени сме да сториме се за да ги спречиме нивните најсилни елементи во играта. Нема да биде лесно, знаат што сакаат. Ние ќе мораме да ја спречиме нивната полуконтра и брз центар и да внимаваме посебно во враќањето кон својот гол. Овој меч ќе ни биде шанса да им вратиме за натпреварот од пред две години и да покажеме дека од тогаш сме напредувале и индивидуално и тимски и да им дадеме на нашите навивачи уште еднаш шанса да се израдуваат“, изјави Ненад Костески пред денешниот тренинг.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
