Видно возбуден, сосема очекувано и оправдано воден од емоциите еден од најзаслужните за големиот успех на Дејан Георгиевски, неговиот тренер Дарко Костовски од плоштадот во Скопје вети дека македонското таеквондо од следните Олимписки игри во Париз 2024 ќе донесе златен медал.
„Ветивме злато од Токио, но ете за малку ни избега. Сепак, сега од тука, од центарот на Скопје може слободно пред сите вас да ветам дека од Париз за три години ќе се вратиме со златен медал“ – истакна пред бројните спортски вљубеници Костовски, притоа дополнувајќи:
„Верувајте, ова не се само празни зборови. Ова се реални ветувања затоа што македонското таеквондо има навистина многу бисери кои во иднина ќе ни носат медали. Ете тука до Дејан, е една девојка Ана Марија Георгиевска која е негова сестра и која го има најголемиот резултат во историјата на еден олимписки спорт, бронза од светско јуниорско првенство. Тука е и Коки Георгиевски, братот на Дејан, наш балкански шампион. До нас се и феноменалните Марко Стевиќ, балкански шампион, Филип Додевски и Филип Стаменов и уште многу други на кои им е неопходна само поддршка и сите се на патот за Париз 2024 да се изборат за А норма а потоа и уште многу медали за македонското таеквондо“.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
