Нико Ковач ја одведе Борусија Дортмунд до четвртфиналето на клупскиот мундијал, но „милионерите“ таму беа елиминирани од Реал Мадрид. Слабиот почеток се покажа клучен, Реал набрзина поведе со 2-0, па иако Борусија заигра подобро во самиот финиш, „милионерите“ немаа сили да стигнат до целосен камбек во четвртфиналето.
Борусија имаше убава можност за 3-3 во последните секунди, но Куртоа маестрално го запре одличниот удар на Сабицер.
„Онаа последна одбрана беше неверојатна… навистина мислев дека топката ќе заврши во мрежата, но Куртоа уште еднаш покажа дека е врвен голман. Мечот го загубивме во првото, а не во второто полувреме. Севкупно гледано, постигнавме повеќе отколку што очекувавме, не е проблем да се загуби од светска екипа како што е Реал Мадрид“, истакна Ковач.
Хрватскиот стручњак потоа се осврна и на ненормалните услови за игра што владеат на терените низ САД на овој клупски шампионат.
„Оваа трева и терените на кои игравме, многу е поразлична од она во Германија и воопшто низ цела Европа. Мислам дека повеќе наликува на трева за голф отколку за фудбал, премногу е кратка, наводнувањето не е како што треба, а згора на тоа игравме на пеколни температури, што го правеше теренот уште потежок за игра“, прокоментира стратегот на Борусија Дортмунд.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
