Томас Милер ги минува последните месеци во дресот на Баерн Минхен откако управата на клубот донела одлука воопшто да не го продолжи договорот со поранешниот германски репрезентативец. Милер не успеа да се наметне кај тренерот Компани, ретко добиваше шанса сезонава, што беше главна причина раководството да реши да не му понуди договор на фудбалерот кој беше синоним за лојалност, одбивајќи бројни понуди во изминатите 17 години колку што ги бранеше боите на Баерн.
Офанзивецот не криеше дека е подготвен да остане доколку клубот му понуди продолжување на соработката, но челниците сепак решија да тргнат во поинаков правец. Како што информира весникот „Кикер“, спортскиот директор Макс Еберл им ја соопштил одлуката на Милер и на неговиот агент, најавувајќи дека воопшто нема да дојде до нови преговори на оваа тема.
Томас Милер ќе мора наскоро да пресече и да одлучи каде ќе ја продолжи кариерата, ако се знае дека тој во последните две години одбиваше понуди од САД и од Саудиска Арабија.
Баерн планира да му организираше проштален натпревар, нешто што ветеранот апсолутно го заслужува ако се знае дека има 12 шампионски титули во Бундес-лигата со баварскиот гигант, како и две европски круни во Лигата на Шампионите.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
