Во последните три натпревари од 3. коло во Суперлигата на Македонија, победи за ракометарите на Куманово, Бутел и Тиквеш.
Во крајно неизвесен натпревар, низ израмнета игра, Куманово славеше со 24-26 на гостувањето против Вардар Неготино. Уште во првото полувреме кумановци се стекнаа со предност од 12-15, а потоа истата ја контролираа низ вторите 30 минути за конечна победа. Сето тоа благодарение само на голманот Киевски кој беше извонреден на голот на Куманово со 17 одбрани.
Ова е прва поведа за Куманово сезонава, наспроти Вардар Неготино кој го запиша и третиот пораз во Групата А од Суперлигата, во која во водство се Вардар 1961 и Алкалоид со по три победи.
А до втора победа во Групата А дојде Бутел кој, исто така низ максимално израмнет натпревар дојде до победа над Струга од 27-25. Првото полувреме заврши со предност на Бутел од 13-12.
Тиквеш дојде до втората победа сезонава во 3. коло од Групата Б, славејќи на гостувањето против Јуниор КВ со 25-32. Ракометарите на Јуниор КВ остануваат со само едно реми по првите три кола од шампионатот.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
