Македонија е подготвена за предизвикот што го носи новиот светски шампионат што нашите ракометари ќе го стартуваат в среда со дуелот против Унгарија закажан за 20.30 часот во Вараждин.
Филип Кузмановски ќе ја има улогата на капитен на нашиот национален тим, а одличниот бек смета дека тимскиот дух и атмосферата што владее во репрезентацијата ќе бидат главни адути на шампионатот во Хрватска.
„Морам да бидам искрен, атмосферата е фантастична, владее неверојатна тимска хемија меѓу сите нас, без апсолутно никакви поделби. Не гледаме на млади или стари, едноставно – ако си дел од оваа репрезентација значи дека си квалитетен, без разлика на годините. Неискуството според некого може да биде проблем, но јас не верувам во тоа, верувам дека поддршката што еден на друг си ја даваме ќе придонесе тоа да се покрие и да одиграме квалитетно од почеток до крај на сите натпревари. Најпозитивно е што сее бориме како тим, сите сме Македонија, и кога победуваме и кога губиме“, вели Кузмановски.
Нашата репрезентација е дел од групата со Унгарија, Холандија и со Гвинеја, а една победа би требало да биде доволна за пласман во следната фаза. Сепак, капитенот најавува борба за што повеќе радости во Вараждин.
„Ние немаме намера да се предадеме против било кој противник, ќе излеземе на терен со јасна желба да се обидеме да стигнеме до победа, бодрени од верните навивачи. Она што мора да ни биде приоритет – секогаш да настојуваме да ја играме нашата игра. Лошо е ако излеземе да сопствениот ритам и влеземе во игра каква што му одговара на противникот, ние мораме да останеме доследни на сопствениот стил. Можам да кажам дека групата е интересна, сите имаме свои шанси и верувам дека сите натпревари ќе бидат неизвесни. Според историјата и нашите успеси од минатото нормално дека сите гледаат на нас како на фаворити против Гвинеја, но ние мораме тоа да го докажеме на терен. Верувам дека ќе славиме на овој меч ако одиграме како што треба, свесни сме дека не смееме да го потцениме противникот бидејќи во денешно време сите напредуваат во ракометната игра“, предупредува капитенот на македонската репрезентација.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
