Селекторот на ракометната репрезентација на Македонија, Кирил Лазаров го имаше првиот собир за подготовките за Светското првенство кое на почетокот на следната година ќе се игра во Полска и Шведска.
За очекувањата околу шампионатот, Лазаров вели дека иако сме аутсајдери во една тешка група со Норвешка, Холандија и Аргентина, неговите ракометари се мотивирани и се надева дека можеме да бидеме изненадување на шампионатот.
„Видов голема желба кај моите играчи и мотивираност за докажување што многу ме радува. Успех е самиот план на Мундијалот, но ќе направиме се да се пласираме во вториот круг. Нема да биде воопшто лесно, но ќе се обидеме да направиме изненадување како аутсајдери. Имам идеја и стратегија и се надевам дека ќе одработиме добро на подготовките и тоа ќе го спроведеме. Сепак, во текот на оваа година помладите играчи добија на самодоверба и можам слободно да кажам дека јас, Стоилов и Миркуловски помогнавме, но мечевите со Романија и Чешка ги извлекоа помладите. Напредувавме многу овој период, што покажа дека доминантно ги победивме Турција и Луксембург. Со голем дел од сегашните репрезентативци летово првпат се боревме и за медал на Медитеранските игри. Имаме многу тешка група и не треба да делиме зборови за Норвешка. Холандија е во страшен подем и Аргентина која на минатото Светско првенство направи одлични резултати, а славеше и против Хрватска предводена од Лино Червар.
Репрезентацијата подготовките ќе ги почне без голманот Никола Митревски кој ќе се приклучи на 23. декември, како и Филип Кузмановски кој поради обврски во Бундеслигата со неговито Хановер ќе дојде на 28. декември.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
