Триумфот на Македонија над Германија во квалификациите за СП 2022 силно одекна во фудбалскиот свет. Серија пофалби на адреса на македонските фудбалери се упатуваат од разни страни, меѓу кои и од легендарните Јирген Клинсман и Алесандро Дел Пјеро кои анализираа за ЕСПН.
Иако, и двајцата, малку се изненадени од начинот на кој „Германците дозволиле пораз“.
„Не знам како загубивме. Во секој случај неочекуван пораз. Имавме шанси, на почетокот и за брзо водство, но кога не се реализираат дојде казната на спротивната страна. Во вториот дел се вративме од пенал, но да бидеме коректни кон Македонците може да кажеме дека и тие требаше да добијат пенал. На крајот, сепак, приредија големо изненадување. Ова е голем шок за Германија, но Македонија заслужи да победи поради дрскоста и пристапот кон играта. Македонија на моменти покажуваше брилијантност која ја однесе до победата. А германските репрезентативци ќе биде подобро да се скријат неколку денови додека не мине сето ова“ – вели легендата на германскиот фудбал, Јирген Клинсман.
Италијанецот Дел Пјеро, пак, во нешто поублажена форма нагласува дека во фудбалот не е чудно да се случуваат вакви работи.
„Знаете, се случуваат вакви работи и не е ништо чудно. Кога ќе го загубите моментумот на теренот, малку ќе се опуштите, па уште во ситуација кога нема публика да ве поттикне тогаш можете да бидете изненадени. Тоа и се случи вечерва“ – истакна Дел Пјеро.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
