Хуманитарниот меч на 3. јануари само ја потврди сплотеноста во македонските ракометни кругови. Уште еден доказ дека и ретките лични несогласувања секогаш биле оставани зад себе, бидејќи приоритет секогаш била и ќе биде репрезентацијата на Македонија.
Во тој правец, ЕКИПА непосредно пред почетокот на СП во Краков ќе има кратки разговори со дел од ветераните кои настапија на овој ракометен спектакл. Прашањата ќе бидат идентични за сите, а искусните ракометни асови ќе ги искажат своите прогнози за овој светски шампионат, настапот на Македонија на него и за нивните предвидувања за движењето на македонскиот репрезентативен ракомет во годините што следат…
Александар Јовиќ долги години го носеше репрезентативниот дрес на Македонија, со која беше дел од големите натпреварувања на ЕП во Италија во 1998, како и на СП во Египет една година подоцна. Крилото одигра значајна улога и на мундијалот во Хрватска во 2009 година, а по завршувањето на играчката кариера е исклучително успешен и како тренер. Имаше можност да работи квалитетно во младинската школа на Металург, а последните години бележи одлични резултати и вади максимум од младите ракометари на Еурофарм Пелистер 2, од кои дел ќе бидат дел и од сегашната сениорска репрезентација на Македонија.
1.Што ќе биде главниот квалитет, а кој би бил најголемиот недостаток, во играта на Македонија во Краков?
Бев присутен и на првиот пријателски меч со Црна Гора, видов една динамична игра, брз ракомет и добра транзиција, нешто што ќе ни биде квалитет во Краков. Најголем проблем ќе ни биде одбраната, ако успееме во овој период да ја подобриме играта во дафанзива мислам дека ќе бидеме компактни во сите фази на ракометната игра.
2. Кој млад македонски играч ќе блесне на ова СП?
Браќата Атанасијевиќ можат да имаат добро првенство и да бидат тактички на високо ниво, а очекувам добри изданија и од Томи Јагуриновски, како и од Ѓоргиев.
3. Од кој пласман на Македонија би биле задоволни на престојното Светско првенство?
За нас голем успех е што го имаме самиот континуитет од настапи на големите натпреварувања, нашите очекувања се големи, некогаш и нереални, но за мене успех би бил пласман во втората фаза, со оглед на тешката група во која се наоѓаме. Верувам дека овој состав е способен за такво нешто.
4. Кои се најголемите фаворити за титулата светски шампион?
Јас би ја издвоил Франција, без оглед на проблемите со отсутни ракометари може да стигне до самиот врв. Или евентуално Норвешка, репрезентација која според мене сега е зрела да се бори за највисок пласман.
5. Има ли македонскиот репрезентативен ракомет сила во иднина да ги достигне и надмине резултатите на вашата генерација?
Од оваа претходна генерација, голем дел од нас сме вклучени во самиот тој проект на развивање на нови млади играчи и идни репрезентативци, верувам дека ракометот ќе остане спорт број 1 уште долго, се наоѓаме на добар пат, се создава добра база и основа за да се прави добра селекција. Со напорна работа на сите вклучен во процесот, во иднина може да се достигнат, па и надминат резултатите на генерациите од минатото.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
