Илија Несторовски е убедливо најдобар фудбалер на Палермо сезонава, но италијанските медиуми во пресрет на денешното гостување против Милан потсетија дека и Македонецот се наоѓа во голгетерска криза, па во последните седум кола постигнал само еден гол, и тој од пенал против Сампдорија. Тренерот Лопез сепак има максимална доверба во нашиот репрезентативец, порачувајќи дека останатите фудбалери на сицилијанскиот клуб треба да сторат повеќе за да му помогнат на Несторовски, за целиот тим да остварува подобри резултати.
„Несторовски е без гол од игра седум меча? Даде гол од пенал со Сампдорија, пенал што ни донесе бод. Не можам да се жалам од Илија, кој има одличен пристап и секогаш се бори максимално. Останатите играчи треба да бидат на негово ниво и да му помогнат, нам ни е потребно и другите играчи почесто да се запишуваат меѓу стрелците“ – истакна стратегот на Палермо.
Несторовски својот последен гол од игра за Палермо го постигна на 5 февруари, кога му ја донесе на сицилијанскиот клуб и последната победа, од 1-0 над тимот на Кротоне.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
