Војната во Спортинг Лисабон ќе заврши со отказ за претседателот Бруно де Карвалјо, кој со изјавите против фудбалерите го навлече бесот не само на играчите, туку и на навивачите и на спонзорите на португалскиот фудбалски гигант. Ова го најавува тиражниот португалски весник „О Жого“, кој тврди дека Де Карвалјо во најскоро време ќе биде сменет од функцијата, а како сериозен кандидат за негов наследник се споменува името на Луис Фиго.
Компанијата „Холдимо“, која е најголем акционер со 29,8% од вкупниот број на акции во клубот најавила тужба против Бруно де Карвалјо, поради нарушен имиџ на клубот, што придонел да дојде и до значителни финансиски загуби поради падот на вредноста на акциите. Токму челниците на „Холдимо“ ќе ја стартуваат иницијативата за смена на актуелниот претседател, а воедно ќе го контактираат и Фиго нудејќи му ја оваа функција.
Луис Фиго во моментов работи во УЕФА, како личен советник на претседателот Александер Чеферин, но португалскиот ас покажал интерес да биде и предводник на гигантот од Лисабон.
Во меѓувреме, Стефан Ристовски и соиграчите продолжуваат со тренинзи, по што Спортинг комплетен ќе настапи на реваншот против Атлетико Мадрид во четвртфиналето од Лигата на Европа.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
