Еден од најдобрите кошаркари на сите времиња и шесткратен шампион на НБА со Чикаго Булс, Мајкл Џордан од следната сезона ќе биде стручен коментатор на натпреварите на американската телевизија NBC, која по 23 години ги откупи правата за емитување на натпреварите во најдобрата кошаркарска лига во светот, објавија бројни американски медиуми.
Џордан, кој беше во НБА како играч на Чикаго Булс, Вашингтон Визардс, а потоа и како ко-сопственик на Шарлот Хорнетс, за прв пат ќе се обиде во улогата на стручен коментатор.
„Емитувањето на НБА натпреварите на NBC беше важен дел од мојата кариера, па затоа со нетрпение ја очекувам посебната улога што ќе ја играм во овој проект“, рече 62-годишната спортска икона.
NBC ги купи правата за емитување за следните 11 години, а ги имаше во текот на 1990-тите, кога Џордан беше на врвот на својата кариера и освои три последователни шампионски титули во НБА со Чикаго Булс во два наврати.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
