Ракометарите на Тинекс Пролет продолжуваат со дуели со екипи од средината на табелата со исти амбиции за влез во плејофот. По ремито на гостувањето во Бутел, следен предизвик за тимот предводен од тренерот Матлиески е E. Пелистер 2, меч што ќе се игра денеска со почеток во 18 часот во салата „Македонско Сонце“.
„Се наоѓаме во добар ритам и сакаме тоа да го потврдиме и на наредниот меч. Работевме навистина напорно оваа седмица, се подготвувавме за овој меч и ќе сториме се за да стигнеме до резултатот шшто го посакуваме. Атмосферата во тимот е одлична, но сакаме на ремито со Бутел да се надоврземе и со бодови против битолчани“, вели Доне Мајнов, еден од најискусните во таборот на Тинекс Пролет.
Според десниот бек, клучна за конечниот исход ќе биде играта во одбрана со која домашниот тим ќе треба да го неутрализира младиот и полетен тим на Е. Пелистер 2.
„Го почитуваме гостинот, но нашата цел е јасна – особено на домашен терен да славиме против сите ривали од битката за влез во плејофот. Знаеме дека нема да биде лесно, но подготвени сме за битка. Одбраната ќе биде клуч, ако успееме да ги затвориме приодите кон сопствениот гол и одиграме квалитетно во дефанзива ќе завршиме голема работа на патот до победата“, вели Мајнов.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
