Се е подготвено за големата борба вечерва во 19 часот во салата во скопска Кисела Вода, во која Работнички и Пелистер ќе ја играат мајсторката за пласман во полуфиналето од плејофот.
Досегашните четири средби завршија со победи на домашните екипи, Работнички имаше почетни 2-0, но Пелистер „воскресна“ со именувањето на Дејан Илиевски за тренер, битолчани убедливо славеа на двете средби на свој терен и сега полни со самодоверба ја очекуваат оваа мајсторка.
„Подготвени сме за она што го очекува нашиот тим, веруваме дека можеме да стигнеме до победата. Не очекувам некои преголеми тактички изненадувања, сепак овие два тима одиграа четири меча за десетина дена, така што играчите добро се познаваат, тренерите знаат што да очекуваат еден од друг. Можеби ќе има одредени детали во кратки периоди, но воглавно се е познато меѓу нас и Работнички. Ќе решава инспирацијата, мислам дека ќе биде тесен и неизвесен дуел што ќе го реши една топка, еден добар напад или одбрана, една судиска одлука… Јас верувам во мојата екипа и се надевам дека инспирацијата ќе биде на наша страна“, вели тренерот Дејан Илиевски во пресрет на денешниот решавачки дуел.
Според него, многу важно ќе биде Пелистер од самиот почеток да влезе во ритам откако на претходните две средби убедливо славеше над денешниот ривал.
„Домашниот терен вообичаено е предност, но кога станува збор за мајсторки тоа може да донесе и дополнителен притисок врз домашната екипа. Не размислуваме премногу за ривалот, туку за нас и за нашата игра. Она што според мене ќе биде важен фактор се почетните минути, за нас е многу важно добро да отворие и да не дозволиме Работнички да го контролира резултатот од почеток. Ако успееме да се одлепиме и да поведеме со најмалку седум-осум поени во почетната фаза, верувам дека ќе го исконтролираме резултатот до самиот крај и обратно, ако Работнички има водство во голем дел од мечот, макар и минимално, тоа сериозно ќе ни ја отежне задачата. Повторувам, знаеме дека нема да биде лесно, но по последните две победи сме оптимисти дека можеме да го комплетираме пресвртот и да Пелистер да се најде онаму каде што заслужува – во полуфиналето“, порачува Илиевски.
================================================
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
